Segundo as estatísticas da Oficina do Peregrino, os datos rexistrados ata o 29 de maio de 2023 sitúan ao Camiño da Geira e dos Arrieiros como o décimo itinerario por número de peregrinos, tendo en conta tanto as rutas oficiais como as non oficiais. En concreto foron 150 os que pasaron pola Oficina para recoller a Compostela, aínda que sinalan que a cantidade total podería ascender a 300, xa que no bar da Geira (Codeseda, A Estrada) foron fotografados 285, segundo sinala a asociación Codeseda Viva.

O número de “Compostelas” é menor ó dos peregrinos fotografados porque a maioría deles xa obtiveron ese documento en varias ocasións (por haber feito outros camiños de Santiago antes) e xa non pasan pola Oficina do Peregrino a recollelo outra vez.

No gráfico aparecen as nacionalidades rexistradas na Oficina do Peregrino neste 2023.
O histórico de nacionalidades (anos 2017 ata hoxe) é: Portugal, España, Brasil, Francia, Polonia, Ucrania, Holanda, Italia, Reino Unido, Suiza, Alemania, Australia, Japón, Dinamarca, EEUU, Eslovenia, Lituania, Republica Checa, Belice, Hungría, México, Aruba, Austria, Azerbaiyán e China.

Un gran éxito do CGA é que máis do 70% dos peregrinos decántanse por percorrelo enteiro (os 240 km desde Braga), rompendo a tendencia doutras rutas nas que cada vez é máis frecuente que soamente se percorran os últimos 100 km, distancia mínima para obter a Compostela.