Entrega dos Premios Abadesa Mariana 2026

A Estrada, 18 de abril de 2026. — A Sala Abanca da Estrada acolleu este sábado a cerimonia de entrega dos Premios Abadesa Mariana 2026. Esta xornada, organizada pola asociación Codeseda Viva, estivo dedicada a poñer en valor o patrimonio e a hospitalidade vencellada ás rutas de peregrinación.

Unha xornada de debate e análise xacobea

O evento comezou ás 11:00 horas coa recepción de autoridades e personalidades do mundo xacobeo, entre as que se atopaban: Xesús Palmou, presidente honorífico da Academia Xacobea; Javier Gómez, presidente da Federación Galega de Asociacións de Amigos do Camiño de Santiago; António Manuel da Cunha, concelleiro de Turismo da Cámara de Terras de Bouro; Eulalia Fonseca, da Dirección Nacional da Associação Espaço Jacobeus de Portugal e Luis Ferreira, novelista portugués especializado nos Camiños de Santiago.

Tras a benvida, celebrouse unha mesa redonda sobre o pasado, presente e futuro do Camiño Xacobeo da Geira e dos Arrieiros (CGA). Entre as conclusións principais, os relatores coincidiron na importancia de evitar a masificación da ruta para preservar a esencia da hospitalidade. Destacouse como fortaleza o vínculo auténtico que se crea entre a veciñanza e os peregrinos; unha relación que está provocando moitos reencontros posteriores.

Unha sorpresa no camiño

Cara ás 12:30 horas, a organización sorprendeu aos asistentes coa entrada na sala de Álvaro Lazaga, un peregrino experto en rutas ibéricas que nese momento percorría o CGA por terceira vez. Lazaga, que nesa etapa camiñaba dende Beariz cara a Codeseda, foi recollido por unha colaboradora no tramo entre Ponte Gonail e Vilaboa para compartir as súas impresións de primeira man sobre a ruta.

Entrega de Galardóns 2026

Ás 13:00 horas, o alcalde da Estrada, Gonzalo Louzao, presidiu o acto oficial de entrega dos premios, que nesta edición recaeron en:

• Xulia Puente: Veciña de Santiago de Tabeirós, recoñecida polo seu labor altruísta no mantemento e embelecemento do Camiño. Dende hai anos, Xulia dedica o seu tempo a decorar a contorna da capela da Consolación con flores e elementos artesanais, como pedras e cunchas de vieira pintadas a man.

• Asociación Cultural Virxe da Grela: Premiada pola recuperación da histórica Procesión da Grela. Esta tradición, vinculada ao santuario de Guadalupe (construído en 1748 con donativos dos mariñeiros da ría de Arousa), deixara de celebrarse asobre o ano 1962. Grazas ao esforzo desta asociación, a romaría, que traslada as imaxes varios quilómetros polo monte, recuperouse no 2016 e mantense viva na actualidade.

• Cámara de Terras de Bouro: Pola súa excelencia na xestión e conservación do tramo da calzada romana Via Nova (entre as millas XIV e XXXIV). Este trazado, coñecido como A Geira, destaca polo seu magnífico estado de conservación, a súa sinalética renovada e o coidado constante do seu patrimonio histórico.