Os problemas de subministración detectáronse na mañá do luns e o servizo quedou restablecido onte – A demanda chegou nun día aos 60m3, fronte a media de entre 10 e 15
Codeseda xa viviu o primeiro corte do ano na súa rede municipal de abastecemento de auga. A situación detectouse á primeira hora da mañá do luns, cando comezou a percibirse nalgúns fogares falta de presión de auga. Chegada a tarde, as billas quedaron sen pinga, algo que non sucedía desde xullo de 2019. A situación prolongouse durante horas, comezando a recuperarse o servizo na mañá de onte.Desde o Concello ofreceuse unha resposta a esta situación, grazas ao contador instalado nos novos puntos de depósito. Segundo apuntou o primeiro tenente de alcalde, Juan Constenla, a parroquia rexistrou o fin de semana un alto consumo de auga, tanto que case quintuplicó a media diaria que viña mantendo. Precisou que habitualmente se consomen cada día entre 10 e 15 metros cúbicos de auga, aínda que en só una das últimas xornadas rexistrouse un consumo de 60 metros cúbicos, baixando despois a 27 e volvendo subir a 41.
Constenla non quixo ofrecer as hipóteses que se barallan para explicar este repentino incremento do consumo. O titular estradense de Medio Ambiente limitouse a recomendar aos veciños un uso racional e responsable da auga, subliñando que é un ben “para consumo humano”. Apuntou que o primeiro que descartou o Concello foi que a falta de auga nos fogares puidese estar relacionada cunha fuga na rede. “A subministración estaba a responder e estaba garantido. Houbo un consumo disparado, que se pode comprobar desde que se puxo o contador cara ao depósito”, dixo. Apuntou que antes se carecía desta medida de control e puntualizou que se podería pensar nunha fuga “se fose un consumo constante”, situación que non se produciu.
Os depósitos municipais de Codeseda quedaron completamente baleiros, de maneira que o Concello tivo que recorrer ao seu abastecemento externo para poder recuperar o servizo. Deste xeito, na mañá de onte os puntos de almacenaxe de auga para esta traída -o antigo e o que acaba de estrearse- xa estaban cheos. “Agora haberá que controlar o consumo”, apuntou o edil. Indicou que os veciños comezaron a chamar ao mediodía do luns ao Concello e que a situación non puido liquidarse ata a mañá de onte. Recoñeceu que as obras para mellorar esta situación tiveron que suspenderse pola crise sanitaria aínda que confía en que poidan completarse para este verán.
O edil de Móvete Iván Sanmartín, lamentou onte a falta de auga e subliñou o prexuízo que iso ocasiona para os negocios da parroquia no seu momento xa de seu complicado. Este grupo urxiu que se liquide esta problemática.
Noticia de Ana Cela publicada en Faro de Vigo o 27.05.2020